Fræðslumiðstöð atvinnulífsins (FA) er verkfærasmiðja sem byggir á samstarfi og þjónustu á vettvangi framhalds- og fullorðinsfræðslu á íslenskum vinnumarkaði. Hlutverk FA er að veita fólki á vinnumarkaði, sem ekki hefur lokið námi frá framhaldsskóla, tækifæri til að styrkja stöðu sína í námi, starfi og samfélagi.

FA starfaði árið 2025 á grundvelli þjónustusamnings við mennta- og barnamálaráðuneytið um verkefni á sviði framhaldsfræðslu samkvæmt lögum nr. 27/2010. Málaflokkur framhaldsfræðslu færðist úr félags- og vinnumarkaðsráðuneytinu yfir til mennta- og barnamálaráðuneytisins þann 15. mars, 2025. FA er í eigu SA, ASÍ, BSRB, fjármála- og efnahagsráðuneytisins og Sambands íslenskra sveitarfélaga og byggir allt starf sitt á víðtækri samvinnu við hagsmunaaðila.

Frá árinu 2005 hefur FA hýst landstengilið Íslands í Norræna samstarfsnetinu um símenntun (NLL) með fjármagni frá Norrænu ráðherranefndinni. Jafnframt hefur FA frá 2017 hýst Hæfnisetur ferðaþjónustunnar sem vinnur samkvæmt þjónustusamningi við atvinnuvegaráðuneytið um uppbyggingu á hæfni starfsfólks í íslenskri ferðaþjónustu. Hæfnisetrið, Fræðslusjóður og NLL gefa út eigin ársskýrslur.

FA hélt úti tveimur vefjum auk fræ.is; hver um sig með skilgreind markmið og markhóp. Þeir eru: Gátt, veftímarit um fullorðinsfræðslu og hæfni.is vefur Hæfniseturs ferðalandsþjónustunnar, þar sem finna má fræðslu- og stuðningsefni fyrir stjórnendur og starfsfólk í ferðaþjónustu.

Árið 2025 voru ársverk hjá FA 12,5 samanborið við 13,5 árið 2024. Í árslok störfuðu 15 starfsmenn í samtals 12,8 stöðugildum. Þar voru þrettán konur samtals í 10,8 stöðugildum og tveir karlmenn í tveimur stöðugildum.

Starfsemi FA byggist á fjölbreyttum verkefnastofnum sem gera ríkar kröfur til sérfræðiþekkingar, yfirsýnar og reynslu starfsfólks. Sérfræðingar FA sinna almennt fleiri en einum verkefnastofni, sem kallar á þverfaglega nálgun, gott samstarf og hæfni til að miðla þekkingu á milli verkefna. Áhersla er lögð á teymisvinnu innan hvers verkefnastofns þar sem styrkleikar starfsfólks eru nýttir markvisst og sameiginleg þekking lögð til grundvallar þróun og framkvæmd verkefna.

Mannauður FA er ein af lykilforsendum þess að félagið geti sinnt hlutverki svo á vettvangi framhaldsfræðslunnar. Á árinu voru reglulega lagðar fyrir starfsánægjukannanir sem liður í því að fylgjast með líðan, starfsumhverfi og viðhorfum starfsfólks. Jafnframt var lögð áhersla á faglega þróun með þátttöku starfsfólks í námskeiðum og öðrum verkefnum sem tengdust sérsviðum þess eða styrktu það faglega með öðrum hætti.

Erlent samstarf FA gegnir einnig mikilvægu hlutverki í símenntun starfsfólks og faglegri þróun félagsins. Þátttaka í alþjóðlegu samstarfi veitir aðgang að nýrri þekkingu, aðferðum og sjónarhornum sem nýtast bæði beint og óbeint í starfsemi FA. Slíkt samstarf er jafnframt mikilvægur hvati að nýsköpun og áframhaldandi þróun á vettvangi framhaldsfræðslunnar.

FA miðlaði upplýsingum um starfsemi sína á vef FA (frae.is) og á samfélagsmiðlunum Facebook og LinkedIn. FA stóð að og tók þátt í fjölda smærri og stærri viðburða í samvinnu við samstarfs- og hagsmunaaðila, innlenda og erlenda. Einnig voru sendir út markpóstar og fréttatilkynningar á fjölmiðla þegar það á við.

Á árinu 2025 fékk vefur FA (frae.is) um 8.100 einstakar heimsóknir. Á vef FA er að finna margvíslegar upplýsingar um Fræðslumiðstöð atvinnulífsins, meðal annars um verkfæri framhaldsfræðslunnar, starfsemi FA, erlent samstarf og innlenda samstarfsaðila. Á mælaborði FA má nálgast tölfræði yfir árangur af starfinu frá upphafi eða frá árinu 2003. Sjá hér.